काठमाडौं । एमिकस क्युरीका रुपमा चयन भएका वरिष्ठ अधिवक्ता सतिशकृष्ण खरेलले प्रतिनिधिसभा विघटन राजनीतिक नभई संवैधानिक विषय भएकाे बताएका छन् ।
संवैधानिक इजलासमा बुधबार आफ्नो बहस सुरु गरेका वरिष्ठ अधिवक्ता खरेलले प्रतिनिधिसभा विघटन संवैधानिक प्रश्न भएको तर्क गरे ।
'प्रतिनिधिसभा विघटन संवैधानिक प्रश्न हो । यसलाई राजनीतिक प्रश्न भन्न मिल्दैन ।,' वरिष्ठ अधिवक्ता खरेलले भने, 'कसलाई मन्त्री नियुक्त गर्ने प्रधानमन्त्रीको राजनीतिक अधिकार र निर्णय हो तर संसद् विघटन राजनीतिक नभई संवैधानिक विषय हो ।'
संसद् पुनःस्थापना भए अर्को प्रधानमन्त्री बन्ने विकल्प छ कि छैन भन्ने विषय भने राजनीतिक भएको खरेलको तर्क छ । प्रधानमन्त्री केपी शर्मा ओलीले सर्वोच्चलाई प्रतिनिधिसभा विघटन राजनीतिक विषय भएको लिखित जवाफ पेस गरेका थिए ।
यस्तै, संविधानले प्रधानमन्त्रीलाई विशेषाधिकार नदिएको खरेलको तर्क छ । 'हाम्रो संविधानले कार्यपालिकालाई कुनै विशेषाधिकार दिएकाे छैन । बोल्दै नबोली प्रधानमन्त्रीको हकमा लुत्त विशेषाधिकार राख्नुपर्ने किन हुन्छ र ? हाम्रो संविधानले कल्पनै नगरेको विशेषाधिकार छ भन्न मिल्दैन ।' खरेलले भने ।
खरेलले संविधानको धारा ८५ मा ‘यस संविधान बमोजिम’ भनेको ७६(७) नै भएको जिकिर गरे ।
