काठमाडौँ । नेपाल कम्युनिष्ट पार्टी नेकपा प्रचण्ड–नेपाल पक्षका नेता भीम रावलले भारतीय गृहमन्त्रीले नेपालको स्वाधीनता र स्वाभिमानका विरूद्ध दिएको अभिव्यक्ति निन्दनीय भएको बताएका छन् ।
मंगलबार सामाजिक सञ्जालमार्फत नेता रावलले भारतीय गुप्तचर संस्था (रअ)का प्रमुखसँग प्रधानमन्त्री केपी शर्मा ओलीले बालुवाटारमा राती भेट्नुले नेपालमा भारतको खुलेआम हस्तक्षेप बढेको बताएका हुन् । नेपाल विरोधी कुनैपनि काम कुरा नेपालीलाई सह्य नहुने उनको भनाई छ ।
‘हालै भारतीय गृहमन्त्रीलाई उधृत गर्दै त्यहाँका एकजना मुख्यमन्त्रीले नेपालको स्वाधीनता र स्वाभिमानका विरूद्ध दिएको अभिव्यक्ति निन्दनीय छ।’ उनले भनेका छन्, ‘यो प्रमं केपीको वालुवाटारमा राती भारतीय गुप्तचर प्रमुखसंगको गोप्य मन्त्रणाको परिणाम हो।नेपाल विरोधी कुनैपनि कामकुरा देशभक्त नेपालीलाई सह्य छैन ।’
भारतका गृहमन्त्री तथा सत्तारुढ भारतीय जनता पार्टी (भाजपा)का पूर्व अध्यक्ष शाहले नेपाल र श्रीलंकामा भाजपा अनुकुलको सरकार स्थापना गर्ने योजना बनाएको त्रिपूराका मुख्यमन्त्री विप्लव देवले बताएका थिए। त्यसपछि उक्त विषयमा नेपालमा विभिन्न टिकाटिप्पणी भैरहेको छ ।
