काठमाडौँ । स्पेनिस ला लिगामा शीर्ष स्थानको एट्लेटिको म्याड्रिडले जित हात पारेको छ । गएराति भएको खेलमा एट्लेटिकोले एइवरमाथि २–१ को पूनरागमन जित निकालेको हो ।
खेलको १२औं मिनेटमा मार्को डिमिट्रोभिकले पेनाल्टीमार्फत गोल गर्दै एइवरलाई सुरुवाती अग्रता दिलाएका थिए । तर, खेलको ४० औं मिनेटमा सुआरेजले गोल गर्दै एट्लेटिकोलाई खेलमा फर्काए । त्यसपछि ८९औं मिनेटमा सुआरेजले पेनाल्टीमार्फत व्यक्तिगत दोस्रो गोल गर्दै एट्लेटिकोलाई महत्वपुर्ण ३ अंक दिलाए ।
जितसँगै एट्लेटिकोले १७ खेलमा ४४ अंक जोडेको छ । एक खेल बढी खेलेर दोस्रो स्थानमा रहेको रियल मड्रिडको ३७ अंक छ । पराजित आइबर १९ अंक जोडेर १५ औं स्थानमा रहेको छ ।
