चितवन । चितवनको भरतपुरस्थित बिपी कोइराला मेमोरियल क्यान्सर अस्पतालमा आउँदो मंसिर १ गतेबाट विस्तारित स्वास्थ्य सेवा (ईएचएस) शुरु हुने भएको छ । अस्पतालका कार्यकारी निर्देशक डा. विजयचन्द्र आचार्यका अनुसार काठमाडौँका सिभिल र गंगालाल अस्पताल जस्तै नमूना सेवा प्रदान गरिने उक्त सेवा केही समयका लागी साँझ ४ः३० बजेबाट विस्तारित स्वास्थ्य सेवा उपलब्ध गराइने छ ।
सेवा सुचारू भए संगै बिरामीले पालो कुर्न नपर्ने र कम खर्चमा सेवा पाउने अस्पतालले जनाएको छ । रेडियोलोजी र प्याथोलोजीको सेवा अन्य समयकै दर रेटमा उपलब्ध गराइने भए पनि अरु सेवामा केहि बढी शुल्क लाग्ने र निजीको तुलनामा निकै सस्तोमा बिरामीले उपचार पाउने अस्पतालको भनाइ छ ।
विस्तारित सेवामा काम गर्ने चिकित्सक कर्मचारीहरुले अतिरिक्त रकम पाउने छन् । बिरामीबाट लिइने सेवा शुल्कले चिकित्सक कर्मचारीलाई भत्ता उपलब्ध गराइने छ । पछिल्ला समयमा सेवा विस्तारसँगै उपचार गर्न आउने बिरामीको संख्या बढ्दै गएको छ ।
२० वर्षअघि चीन सरकारको सहयोगमा स्थापना भएको यस अस्पतालमा देशभरका र भारतीय सीमा क्षेत्रबाट बिरामी उपचारका लागि आउने गर्छन् । गत, आर्थिक वर्षमा अस्पतालवाट एक लाख ४२ हजार ३७७ जनाले सेवा लिएका छन् । जसमध्ये सात हजार ८९३ जनाको क्यान्सर पहिचान भई उपचार भइरहेको छ । एकसय शैय्याबाट शुरु भएको अस्पतालमा हाल ४५० शैय्या रहेको छ ।
