चितवन । पश्चिम चितवनको मेघौली धरमपुरका स्थानीय बासिन्दालाई समयमै पुल निर्माण नहुँदा आवातजावतमा निक्कै सकस हुने गरेको छ ।
विसं २०६९ सालमा बेतरी खोलामा आएको बाढीले भरतपुर महानगरपालिकाको वडा नम्बर २७ स्थित तेलौलीबाट धरमपुर जाने बेतरी खोलाको पुल भत्काएको लामो समय बित्दा समेत पुल निर्माणकार्य नहुँदा मेघौली तेलौलीका बासिन्दालाइ घन्टौँ हिँडेर धरमपुरमा जानुपर्ने बाध्यता रहेको छ ।
झन्डै २०० जनाको संख्यामा रहेका यस क्षेत्रका घरधुरीलाइ आवातजावतमा अत्यन्त कष्ट भैरहेको छ भने, पुल नहुँदा बर्खा लागेको समयमा विद्यार्थी स्कुल जान पनि सकिरहेका छैनन् ।
अहिले सम्म तीनपटक डीपीआर भए पनि अझ निर्माण हुन नसक्ने सामान्य मर्मत मात्रै हुँदा बाढीले भत्काउने गरिएको स्थानीयको भनाइ छ ।
हिउँदमा गाडीले खोला तर्न सक्ने भए पनि वर्षायाममा समस्या छ । खोलाले पुल भत्काएको यतिका समय भइसके पनि सम्बन्धि निकाय भने मौन छन् । पुल निर्माण नहुँदा खोलापारीको गाउँ र वारीको गाउँको सम्बन्धविच्छेद भएको स्थानीयको भनाइ छ । यो पुललाइ प्रचण्डपथ नामाकरण गरिएपनि मर्मत सम्भार भने हुन नसकेकोमा स्थानीय कृष्ण बस्यालले दुखेसो पोखे ।
त्यस्तै, अर्का स्थानीय रोशन चौधरीले पनि पुल निर्माण नहुँदा यस क्षेत्र भएर स्कुल बस, एम्बुलेन्स लगायतका साधनहरु सहजरुपमा पुग्न नसकेको बताए । उनले विशेष गरेर बच्चालाई आवातजावतमा निक्कै कठिनाइ हुने गरेको बताए ।
त्यस्तै, अर्का स्थानीय मन्जु थारुले पुल निर्माण नहुँदा आवातजावतमा समस्या हुने गरेको र प्रचण्डपथ नामाकरण गरिएपनि पुल भने भत्किएर काम नलाग्ने अवस्था भएको बताइन् ।
ग्रामीण जीवन आफैँमा कष्टकर त छँदैछ, अझ यस्ता समस्याहरुमा जिम्मेवार निकायहरु नै उदासीन बनिदिँदा स्थानीयलाई थप दुःख हुने गरे पनि भरतपुर महानगर २७ का वडाध्यक्ष गोविन्द तामाङले भने पुल निर्माणका लागि कुनै सुरसार गरेका छैनन् । जस्ले गर्दा यहाँका स्थानीय बासिन्दालाई यो बाटो भएर ओहोरदोहोर गर्न निक्कै कठिनाइ त भएको छ नै सम्बन्ध बिच्छेद समेत भएको छ ।
