चितवन । आन्तरिक राजस्व कार्यालय चितवनले नारायणगढस्थित लायन्सचोकमा रहेको आलुमण्डीका तीन पसलहरुलाई कारवाही गरेको छ ।
स्थायी लेखा नम्वर (प्यान) को प्रमाणपत्रमा उल्लेख भएको भन्दा फरक स्थानमा सञ्चालन भएका दुई वटा र खरिद बिक्रीको बिल नियमित अद्यावधिक नगर्ने एउटा पसललाई राजश्वले १० हजार रुपैयाँका दरले जरिवाना तिराएको हो ।
आन्तरिक राजस्व कार्यालय भरतपुर महानगरपालिका, खाद्य प्रविधि तथा गुण नियन्त्रण डिभिजन कार्यालय, साना तथा घरेलु उद्योग कार्यालय लगायतहरुको संयुक्त अनुगमन टोलीले पल्स मार्केटिङ, ओम साई स्टोर्स र पशुपती आलु भण्डारलाई नयाँ आर्थिक ऐन ०७६ अनुसार कारवाही गरिएको आन्तरिक राजस्व कार्यालय चितवनका नासु रामकृष्ण श्रेष्ठले जानकारी दिए ।
त्यस्तै, भ्याटमा दर्ता भएको दियालो स्टोर्समा १० वटा स्टिमेट बिल फेला परेपछि कागजपत्र जफत गरिएको श्रेष्ठले बताए । भरतपुर महानगरपालिकाका राजस्व अधिकृत अनुज घिमिरेले आलु प्याजका अधिकांश ठूला व्यापारीहरु भ्याटमा दर्ता नभएको बताए । आलु प्याजको मूल्यमा एकरुपता नरहेको एवं बिलबिजक पनि राम्रो सँग जारी नभएको पाइएको घिमिरेले बताए ।
