चितवन । पर्यटन वर्ष–२०२० लाई लक्षित गर्दै चितवनको नारायणी नदीमा आजदेखि 'स्पीड मोटरवोट' संचालनमा ल्याएको छ । आयूस्मा मोटरवोट कम्पनी प्रालिले नारायणी नदीमा उक्त मोटरवोट संचालनमा ल्याएको हो ।
मुग्लिन–नारायणगढ सडक खण्डमा पर्ने इच्छाकामना गाउँपालिका–६ कालिखोलादेखि त्रिशूली नदीसम्म सुरु भइ भरतपुर महानगरपालिका–१६ मंगलपुर सानोगढी नजिक नारायणी नदीमा पुगेर सकिने उक्त मोटरवोटको आज एक कार्यक्रमकाुबीच प्रदेश सांसदद्वय घनश्याम दाहाल र कृष्ण भुर्तेलले समुद्घाटन गरेका छन् ।
मोटरवोटको उद्वाटन गर्दै प्रदेश सांसद दाहालले त्रिशूली नदीमा साहसिक मोटरवोट गर्न रुचाउने पर्यटकले र्याफ्टिङ गर्दै आएको र अब अन्य पर्यटकले पनि मोटरवोट मार्फत जलयात्राको आनन्द लिन पाउने बताए ।
नेपाल सरकारले स्वीकृती दिएको यो अहिले सम्मकै लामो स्पिड मोटरवोट भएको बताइएको छ । पाँच सय रुपैयाँ भन्दा माथि शुल्क तोकिएको 'स्पिड मोटरवोट' बाट इच्छाकामना गाउँपालिका ६ स्थित कालीखोलादेखि भरतपुरको सानोगढीसम्म ४५.५ किलोमिटर दुरीमा जलयात्रा गर्न सकिने कम्पनीले जनाएको छ ।
मोटरवोट चढ्नका लागि काठमाडौंको ठमेल र नारायणगढको पुल्चोकमा मूख्य टिकट काउन्टर राखिएको छ ।
कालीखोलादेखि सानोगढीसम्म प्याकेज सिस्टम, सिंगल र कपल टिकट समेत व्यवस्था गरिएको कम्पनीले जनाएको छ । हाल एउटा मात्र वोट संचालनमा आएको र थप दुई वटा 'स्पीड मोटरवोट' ल्याउने तयारी भइरहेको आयुश्मा मोटरवोट कम्पनीका उपाध्यक्ष गणेशबहादुर थापाले जानकारी दिए ।
यस्तै, नेपालमा जलयात्राको व्यवस्था कम भएकोले पर्यटन वर्ष २०२० लाई लक्षित गरेर कम्पनीले मोटरवोट सञ्चालनमा ल्याउदा यस्ले पर्यटन प्रर्वदनमा समेत राम्रो हुने स्थानीय कृष्ण बरालले जानकारी दिए ।
कम्पनीले आउँदो वर्षसम्ममा तीन देखि पाँच करोड सम्मको लगानी गर्दै ४० सिटरको स्मल क्रुज २ महिनाभित्रमा संचालन गर्ने योजना गरेको छ । आयूस्मा मोटरवोट कम्पनीले २०७५ साल फागुन ६ गते नेपाल सरकारबाट त्रिशुली र नारायणी नदीमा कार्य संचालन गर्नका लागि स्वीकृती पाएको थियो ।
