नयाँ वर्षलाई सबैले आ–आफ्नो शैली र ढंगले मनाउने गर्छन् । सभ्यताको विकाससँगै नयाँ वर्षलाई उत्सवका रूपमा मनाउने परम्पराको विकास भइरहेको छ । सञ्चार क्षेत्रले संसारलाई एउटा साँघुरो घेरामा बाँधिरहेको बखत संसारभर मनाइने नयाँ वर्षको शैलीमा एकरूपता आइरहेको विश्वास गर्न सकिन्छ ।
नयाँ वर्षलाई स्वागत गर्ने तरिका र शैली अलग होलान् तर संसारभरका मानिस नयाँ वर्षमा नयाँ सोचको विकास गर्दै आफूसँग रहेका पुराना सोच त्याग्ने र खराब बानीलाई विसर्जन गर्ने अवसरका रूपमा प्रयोग गरिरहेका हुन्छन् । खासगरी नयाँ पुस्ताका मान्छेहरू नयाँ वर्षलाई उत्साह, उमंग र सफल वर्षका रूपमा अनुवाद गर्ने संकल्प अघि सारिरहेका हुन्छन् । हाम्रै सन्दर्भमा पनि अनेकौं विकृति र विसंगतिले गाँजेको हाम्रो राजनीतिक र सामाजिक संस्कारमाझ राजनीतिक पार्टीहरूले नयाँ वर्षलाई सद्भाव र सहकार्यको वर्षका रूपमा संकल्प गरून् । त्यसो भयो भने अब उप्रान्त संसद् अवरुद्ध हुने थिएन होला अनि बन्द र निषेधको राजनीतिक संस्कारको अन्त्य हुने थियो होला । त्यसैगरी सम्पूर्ण देशवासीले नयाँ वर्षदेखि आफ्नो फोहोर व्यवस्थापनको संकल्प गर्ने हो भने कम्तीमा अबको पुस्ताले फोहोरसँग जुझ्नुपर्ने थिएन कि ? नयाँ वर्षलाई केवल पात्रो परिवर्तनको अर्थमा मात्र नलिऔं ।
राजनीतिक परिवर्तनहरु धेरै भएका छन् हरेक वर्ष नयाँ वर्षमा हामीले यो वर्षलाई समृद्धिको वर्ष बनाउने संकल्प गरिरहेका छौं । मुलुकमा भएको पछिल्लो राजनीतिक परिवर्तनपनि आएको सरकारले अहिले स्थायीत्व पाएको छ । अस्थिर हुँदै आएको सरकार स्थिर हुँदा पनि एक वर्षमा केही भएन भन्ने गुनासो आएरहेका छन् । यस्ता गुनासोहरुको जवाफ दिने काममा सरकारका प्रधानमन्त्रीदेखि मन्त्रीहरु आफै पोख्त देखिएका छन् । राजनीतिक परिवर्तन आएपनि मुलुकमा विकास र समृद्धिको परिवर्तन जनताले कल्पनामात्रै गर्नुपरेको छ । उनीहरुले पत्यक्ष रुपमा यसको भोग गर्न पाएका छैनन् । हरेकले आज नयाँ वर्षका दिन नयाँ संकल्प गरी नयाँ सोचको बाटो पहिल्याउन शुरु गर्दछन् । यसैगरी सरकारले पनि यो वर्षलाई समृद्धिको वर्षको रुपमा लिएर अघि बढेको छ ।
अघिल्लो वर्षलाई सम्बृद्धिको आधार वर्षका रुपमा लिएको सरकारले यो वर्षलाई भने समृद्धिको वर्ष बनाउने घोषणा गरेको छ । घोषणमा मात्रै समृद्धि नभएर आम जनताले भोग्ने र अनुभुति गर्ने सरकारले गर्नु आवश्यक छ । सरकारले जनतालाई साथमा लिएर गरेको हरेक आयोजनाहरु सफल बनाउन सक्दछ । जनताको चाहनाअनुसार विकासको गतिलाई अघि बढाउने सकेमा मुलुकको सबै क्षेत्रहरुले सम्बृद्ध नेपालको बनाउन धेर कुर्नै पर्दैन । सबै जुटौं, सबै आ–आफ्नो क्षेत्रबाट मुलुकको सम्बृद्धिमा लागौं । हाम्रा पाठक, शुभचिन्तक, सुभेच्छुक तथा विज्ञापनदाता र साझेदार संस्थाहरु सबैलाई हाम्रो तर्फबाट नयाँ वर्षको शुभकामना ।
