सिमकोट । हुम्लाको दक्षिण भेगमा रहेको चङ्खेली गाउँपालिका–२ को महादेव माविको मतदान केन्द्रमा बुधबार पुनः मतदान हुने भएको छ । गत शुक्रबार स्थगित भएको निर्वाचन बुधबार हुने मुख्य निर्वाचन अधिकृत जगतबहादुर पौडेलले जानकारी दिए ।
वैशाख ३० गते आधाभन्दा बढी मतदाताले मत खसाल्न नपाएको भन्दै उजुरी परेपछि आयोगले उक्त मतदान केन्द्रमा पुनः मतदान गराउन लागेको पौडेलले बताए । बुधबार ७ देखि साँझ ५ बजेसम्म मतदानको समय तोकिएको छ ।
मतदानका लागि कर्मचारी र मतपत्र पठाइसकेको जानकारी प्राप्त भएको छ । निर्वाचनका लागि सुरक्षा व्यवस्था कडा पारिएको छ । उक्त मतदान केन्द्रमा ९०३ मतदाता रहेकामा ३९० मत मात्रै खसेको थियो । गत शुक्रबार गठबन्ध र स्वतन्त्र उम्मेदवारका दुई पक्षबीच मतदानका क्रममा झडप भएको थियो ।
